تدرين وش في غيبتك مستفيده ؟؟

المساهمات : 22 تاريخ التسجيل : 03/11/2011

أنا وش اللي بغيبتك مستفيده؟!
صدري وصل بالهم حد الشباعه..

الصبح يضحك لي بضحكه جديده..
وأنا الي هالحين مانمت ساعه..

اسهر واسامر كل نجمه فريده..
وإن نمت قالت ليه هذي القطاعه..

ياغايبه والليل لااشتدت ايده..
يدي ضعيفه ماتقاوي صراعه..

الحب دمٍ والمواصل وريده..
والقلب هو اللي يزيد اندفاعه..

غيابك الله يمحقه لايعيده..
لا زاد زاد الجرح معه اتساعه..

جاعت عيوني شوفتك ياعنيده..
ماترحمين اللي بلته المجاعه..

غبتي وسميتك قريبه بعيده..
والعين تحسد خافقي عالقناعه..

بيني واحزاني علاقه وطيده..
مثل العلاقه بين عقرب وساعه..

نسياني اكذب من كلام الجريده..
وكتماني اعتم من عتام الاشاعه..

ولا جِداي إلا حروف القصيده..
عسى تزودني اشوية مناعه..

لكـ الله اصبر عالرياح الشديده..
يالمركب اللي ضاع منه شراعه..

عسى الفرج يقبل ويهناك عيده..
وتبات عين اللي شقى البُعد لاعه..

ياغايبه والنخل يبس جريده..
ولا يغرك راسها وارتفاعه..

مدري غيابك وش باقي مزيده..
مالي على صد إلتياعي براعه..

تدرين وش في غيبتك مستفيده؟!
إني اصلي الفجر ويا الجماعه..